Mag-iloy patay sa sunog sa Brgy. Pagdugue, Dumangas

ILOILO — Patay ang mag-iloy sang nasunog ang balay sa Brgy. Pagdugue, Dumangas mga las 4:40 kaina sang kaagahon, Nobyembre 10.

Basi sa inisyal nga impormasyon nga nakuha sang Aksyon Radyo Iloilo sa Dumangas MDRRMO, patay ang 38-anyos nga iloy nga maestra kag ang tatlo niya ka bata.Naga-edad ang mga bata sang walo ka tuig nga lalaki, anum ka tuig nga lalaki, kag tatlo ka tuig nga babaye.

Na-trap ang apat sa ila kwarto sang nagluntad ang sunog, suno pa sa impormasyon.Las 4:45 sang aga sang nabaton sang BFP Dumangas ang report nga may sunog. Las-5:19 naman sang aga gindeklarar nga fire out.

Human sa light materials ang balay kag apat ka poste na lang sang haligi ang nabilin bangud sa sunog.

Base pa sa impormasyon, magguwa pa kuntani sa bintana ang iloy agud mangita sang paagi nga makasalbar sa sunog, apang may steel matting.

Napahibalo na ang bana sa natabo sa iya asawa kag tatlo ka kabataan apang nagpangabay gihapon ang pamilya nga indi paghingadlan ang mag-iloy bangud may mga himata pa sila sa abroad nga wala nakahibalo.

Duha ka semana pa lang nga nagkadto sa Manila ang bana agud magproseso sang iya mga papeles agud magbalik sa iya trabaho abroad.