Suspek nga nag-hold up sa lugawan sa Jaro, na-identify na sang pulis
ILOILO CITY –Nakilala na sang Jaro police ang lalaki nga nagsulod sa ‘Lugawan ni Bro’ sa Brgy. Democracia, Jaro kaina sang kaagahon, Enero 19, 2022.Pero naghingyo si PCPT Eduardo Siacon, Jr., hepe sang Jaro Police Station, nga indi pa pagpangalanan ang suspek bangud nagapadayon ang ila hot pursuit operation.
Suno kay Siacon, naga-istar man lang sa isa sa mga barangay sa Jaro ang suspek, kag may mga records sang una nga pagpangawat.
“Noted na. Manaya [siya] kutsilyo, agawon niya cellphone mo,” suno kay Siacon.Posible suno sa hepe nga nagangisog ang suspek sang nalabayan nga lunsay babaye ang nagabantay sa lugawan kag wala sang security guard.
Nakuhaan sang CCTV footage ang lalaki gani nga madasig siya nga na-identify, suno kay Siacon.
Gin-athag naman ni Siacon nga wala na-report sang mga nagabantay sa lugawan nga may nakuha ang lalaki nga kwarta bangud dali-dali ini nga naglakat sang naghambal ang isa sa mga nagabantay nga yara na ang police.
Pero base sa interview sang Aksyon Radyo Iloilo News Team kay Mary Grace Albancia nga isa sa mga nagabantay sa lugawan, masobra P5,000 nga cash nga nasulod sa bag ang nakuha sang suspek.
Ang lugawan, ginabanta nga 50 tubtob 60 metros lang ang kalayuon halin sa Jaro Police Station. — via PM Reports
