Lalaki, patay sang nakabunggo sa puno sang kahoy ang ginamaneho nga motorsiklo sa Dingle

ILOILO — Patay ang 30-anyos nga lalaki sang aksidente nga nakabunggo ang ginamaneho nga motorsiklo sa Siniba-an, Dingle las-10:30 kagab-i, Abril 15.

Ginkilala ang driver kay Jhovanie Sanchez, residente sang Calicuang, Dingle.

Sa imbestigasyon sang Dingle PNP, naka-inom sang makahulubog nga ilimnon si Sanchez kag ginapatihan nga madasig ang pagmaneho sang motorsiklo rason nga nakabunggo sa puno sang eucalyptus.

Suno kay PMAJ Jonah Galicha, hepe sang Dingle Municipal Police Station, wala sang ginasuksok nga helmet si Sanchez rason man nga nawasak ang iya ulo bangud sa impact sang pagkabunggo.

Gintinguhaan pa nga dal-on sa pinakamalapit nga clinic si Sanchez pero wala na matabangan.