6 ka boarding houses sa Mandurriao, ginpapanaugan sang closure order

ILOILO CITY – Ginaproseso sang tag-iya sang boarding house sa Brgy. San Rafael, Mandurriao ang paggawad sang business permit sa city government.

Pero suno kay Fe, may problema siya sa duta nga ginatindugan sang boarding house.

Gin-ako ni Fe nga pila ka beses na nga nagkadto sa ila ang personnel sang siyudad agud mag-check kun na-comply na ang mga requirements para makakuha sang business permit. Pero wala gihapon matapos kag ikatatlo na ka warning ang nabaton ni Fe gani gintapikan sang tarpaulin nga may nasulat may kaangtanan sa closure order ang iya boarding house sang Biyernes, Pebrero 23.

Suno kay Fe, batunon niya na lang kun indi siya makahingagaw sa pagkuha sang permit. “I-inform ta na lang aton boarders nga ma-vacate sila. Siempre maluoy ka man tani kay luwas lapit sa ila obrahan, maka-save sila sa plete kay walking distance lang sa ila naobrahan.”

Anum ka balay sa Barangay San Rafael ang ginpapanaugan sang siyudad sang closure order tungod wala sang business permit.

Gin-athag naman ni Fe nga antes pa nasunog ang pila ka boarding houses sa Barangay San Nicolas, La Paz sang Pebrero 18 sa diin may duha ka boarders nga napatay, may nagalibot na nga taga-siyudad kag naga-check sa mga boarding houses. —via Aksyon Hotline