2 ka maestra sa Santa Barbara napatay tungod sa aneurysm; Report nga napatay samtang nagaklase tungod sa heat stroke, indi matuod — DepEd Iloilo

ILOILO— Napatay tungod sa aneurysm samtang yara sa ila balay ang duha ka manunudlo sa Sta. Barbara Central Elementary School kag indi samtang nagaklase.

Ini suno kay Mr. Leonil Salvilla, public affairs officer sang Schools Division Office of Iloilo, base sa impormasyon nga natipon halin sa district supervisor kag public affairs coordinator sa Sta. Barbara.

Wala sang kamatuoran suno kay Salvilla, ang nagalapta nga impormasyon nga napatay ang duha ka mga manunudlo samtang nagaklase kag tungod sa heat stroke.

Base sa impormasyon ni Salvilla, Pebrero pa sang napatay ang isa ka manunudlo, samtang una nga semana sang Abril napatay ang isa pa.

Wala pa sang dugang nga impormasyon si Salvilla sa identity sang duha ka napatay.

Ang aneurysm isa ka abnormal nga swelling sa wall sang blood vessel kasubong sang artery. Mahimo matabo ang aneurysm sa bisan diin nga parte sang circulatory system pero masami sa aorta (ang main artery sang lawas) kag sa mga blood vessels sang utok.

Una na nga nagpatuman sang blended learning modality ang mga eskwelahan sa probinsiya tungod sa kapaang sang tiyempo kag agud maproteksyunan ang mga estudyante kag mga manunudlo.

Sa pagkatuod suno sa iya, naga-coordinate man sila sa mga eskwelahan sa probinsya kun may mga insidente sa mga estudyante kag manunudlo tungod sa epekto sang mainit nga tyempo kag gilayon sila nga magpasa sang incident report.

Samtang, nagpaguwa man sang statement ang DepEd 6 may kaangtanan sa sini nga report.

Indi matuod suno sa DepEd 6 ang nagalapta nga report nga napatay ang mga manunudlo samtang nagaklase.

Gintadlong man sang DepEd nga aneurysm kag Hypertensive Cardiovascular Disease, ang ginkamatay sang mga manunudlo kag indi heat stroke kag yara sila sa ila balay sang napatay.

Gintawag man sang DepEd nga misleading ang headline sang radio station sa Iloilo nga nagpaguwa sang balita kag ila ginkasubo nga may news outlet nga naga-sensationalize sa pagkamatay sang duha ka mga manunudlo imbes nga mag-report sang insakto nga impormasyon. — via Aksyon Farrah Mae Morano