Bingawan, Iloilo nagdeklarar sang state of calamity tungod sang water shortage

ILOILO — Nagdeklarar sang state of calamity ang Bingawan tungod sa kakulang sang supply sang tubig nga resulta sang nagapadayon nga El Niño phenomenon.

Ini na ang ikatatlo nga banwa nga nagdeklarar sang state of calamity sa Iloilo sunod sa Sara kag Estancia.

Suno kay Mayor Mark Palabrica, unanimously approved sang Sangguniang Bayan ang rekomendasyon sang Municipal Disaster Risk Reduction and Management Office (MDRRMO).

Nagalab-ut sa P400,000 ang calamity fund sang banwa nga gamiton sa pagpangita sang dugang nga water source, pagbakal sang bulong sa mga balatian kasubong sang diarrhea, sore eyes kag heat stroke.

Apektado sang kakulang sang tubig ang 1,700 ka water source sa nagkalain-lain nga barangay sa Bingawan.

Tungod nga nadeklarar na ang state of calamity, ma-access na sang mga barangay ang ila calamity fund agud i-augment sa mga kinahanglan para nga masolusyunan ang problema sa kakulang sang water supply. — via Aksyon Cedrick Anona