P1.8 million nga balor sang suspected shabu na-recover sa babaye nga ginakabig “bodegera” sang illegal drugs sa Barotac Nuevo

ILOILO— Na-recover ang P1.8 million nga balor sang suspected shabu nga nagabug-at sang 275 grams sa babaye nga ginatudlo bodegera sang illegal drugs sa Brgy. Lico-an, Barotac Nuevo kahapon, Abril 29.

Suno kay Police Captain Ryan Christ Inot, team leader sang Regional Police Drug Enforcement Unit (RPDEU), nadakpan sa drug buy bust operation si Alyas Riza, 38-anyos nga ginakabig sang police nga “High Value Individual” drug personality.

Sa pagpangusisa sang police, ginadul-ong lang kay Riza ang supply sang illegal drugs halin sa iya live-in partner nga preso sa Muntinlupa.

Gina-distribute pa ni Riza ang mabaton nga druga sa iya mga distributor sa iban nga mga banwa, suno kay Inot.

May mga nagabakal man sa subject sa ila balay kag kun kaisa, siya ang nagadul-ong sa lugar sang mabakal.

Tatlo ka semana gin-monitor sang RPDEU kag Barotac Nuevo police ang subject tubtob nahuman ang operasyon. — via Aksyon Farrah Mae Morano