4 ka balay nasunog sa Barotac Nuevo

ILOILO — Apat ka mga balay ang nasunog sa Barangay Tiwi, Barotac Nuevo kahapon sang aga, Hunyo 16.

Duha diri ang totally damaged kag duha ang partially damaged.

Suno kay SFO4 Jean Monsale, municipal fire marshal sang Barotac Nuevo Fire Station, posible electrical in nature ang ginhalinan sang sunog tungod nakasugid ang tag-iya sang balay kun diin nag-umpisa ang kalayo nga nag-kirap-kirap pa ang suga kag may nabati-an nga pagsirit antes pa magluntad ang sunog.

Ginpahayag man ni Monsale nga nakaagum sang second degree burn ang tag-iya sang balay kun diin nag-umpisa ang kalayo tungod gintinguhaan pa niya nga patyon ang ila circuit breaker antes magguwa. Magluwas sa iya wala na sang may napilasan.

Naglab-ot sa ginabanta P650,000 ang balor sang kahalitan sang sunog.

Gindeklarar fire out las-6:16 sang aga. — via Aksyon Maria Kayla Tingzon