Traffic enforcer ginreklamo nga nagpangilkil sa Molo; Pulis ginreklamo man sang barangay kagawad sa indi maayo nga aktuwasyon

ILOILO CITY – Ginreklamo ni San Pedro, Molo Barangay Kawagad Rhomar Martirez ang pila ka mga personnel sang Iloilo City Traffic Management Unit (ICTMU) sang pagpangilkil sa mga tag-iya sang tricycle sa ila barangay sang Hunyo 17 sang aga.

Antes sini, ginpabutiyag ni Martirez nga ginpahibalo siya sang mga pumuluyo nga nagahimo sang clearing operation ang mga personnel sang ICTMU sa atubang sang ila barangay hall gani iya ginkadtuan agud magiyahan.

Nagsakay si Martirez sa iya motorsiklo padulong sa barangay hall pero ginsita siya sang police nga naga-upod sa clearing operation tungod wala siya sang suksok nga helmet. Ginpaathagan niya ang pulis nga nalipatan niya ang helmet tungod sa sobra ka dali.

Bisan nagpakilala na nga kagawad si Martirez kag nagpangayo sang pasensiya, ginsinggitan siya suno sa iya sang police nga “Helmet mo. Kagawad ka wala ka naga-helmet?”

Nagsabat ang kagawad nga issuehan na lang siya sang TOP kun may yara siya sang violation kag indi na pagsinggitan tungod madamo sang tawo. Wala gin-issuehan sang TOP ang kagawad kag nag-park na lang siya agud magbulig sa clearing operation.

“CLEARING OPERATION SANG ICTMU”

Suno kay Martirez, nagreklamo ang pila ka mga residente nga bisan wala nag-obstruct ang ila tricycle, nadalahig sila gihapon sa clearing operation.

Tungod sini, nagtawag si Martirez kay ICTMU Head, Retired Colonel Uldarico Garbanzos agud ayuon nga kun mahimo indi lang pag-impound ang mga tricycle tungod wala man naga-obstruct sa dalan. Nagpasugot man suno sa iya si Garbanzos.

Pero nagsabat ang isa sa mga personnel sang ICTMU, suno kay Martirez sang “’Kagawad okay ah. Pero dal-on lang namon anay sa YMCA [ang mga tricycle] pa-updi lang sang tawo ukon sin-o man da ang driver.’”

“GINPAHAYAG PAGPANGILKIL SANG ICTMU PERSONNEL”

Nakibot si Kagawad Martirez sang nagtawag sa iya ang isa sa mga tag-iya sang tricycle nga nagpanugid nga ginpangayuan sila sang “pangpamahaw” sang mga ICTMU personnel. May naghatag sang P100 kag P200 nga tricycle driver.

Wala ini nauyunan sang kagawad tungod ginapanindugan niya nga pigado ang pangabuhi sang mga tricycle driver gani indi nagakadapat nga pangayuan sila sang kuwarta.

Gintawgan ni Martirez ang taga-ICTMU kag ginsukmaan nga ginpangayuan nila sang pamahaw ang mga tricycle driver. Nag-sorry ang ICTMU personnel kag naghambal ibalik na lang ang kuwarta.

“NAGLAIN ANG BUOT SA PULIS”

Tungod sa kalain sang buot sa pulis nga nagsinggit sa iya, nagtawag si Martirez kay Police Lieutenant Colonel Lorenz Losaria, Deputy City Director for Operations sang Iloilo City Police Office (ICPO) agud i-report ang aktuwasyon sang pulis kag nagpasalig nga ipatawag ang natungdan.

“REKLAMO NI KAGAWAD MARTIREZ VS. GARBANZOS”

Kahapon sang aga, gintawgan ni Garbanzos si Martirez kag gin-usisa kun ngaa gin-report ang police sa ila nga head.

Ginpahayag sang kagawad nga gintaasan siya sang tingog ni Garbanzos samtang naga-istoryahanay sila sa cellphone. Diri na kag ginsukmaan man ni Martirez si Garbanzos kun ngaa nagpangayo sang pangpamahaw sa mga tag-iya sang tricycle ang team sang ICTMU.

Ginakwestiyun ni Martirez ang ginhimo ni Garbanzos tungod indi naman siya konektado sa ICPO.

Tungod sa natabo, nag-report si Martirez kay Iloilo City Mayor Jerry Treñas agud maplastar kag mapaathag ang natabo. Nagpasalig ang alkalde nga aksyunan ang reklamo sang kagawad kag mahatagan sang leksyon ang ICTMU personnel.

Ginpasumiter sang affidavit si Martirez nga nagaplastar sang iya reklamo.

Nagpangayo man suno sa iya sang pasaylo si Garbanzos sang nagpadulong ang kagawad sa iya opisina. — via Aksyon Farrah Mae Morano