Homecoming para sa contingents sang Iloilo Dinagyang Festival nga nagkampeon sa Aliwan Fiesta 2024 planuhan pa sang IFFI
Planuhan pa sang Iloilo Festivals Foundation, Inc. (IFFI) ang homecoming sang Tribu Pan-ay, ang nagrepresentar sang Dinagyang Festival kag nagkampeon sa street dance competition sang Aliwan Fiesta 2024.
Suno kay IFFI Executive Director Joyce Clavecillas, natalana nga magbiyahe sa Lunes sang hapon ang mga performers kag maabot sa syudad sa Martes sang udto.
Pag-abot sa syudad, mapahuway lang sila sang gamay kag amo na ang pag-arrange sang schedule, venue, traffic plan kag iban pa nga kinahanglanon sa homecoming, suno sa iya.
Malipayon nga mapauli ang mga performers kag bilog nga team sang Iloilo Dinagyang Festival tungod wala nila ginpaslaw ang mga Ilonggos nga nagasuporta kag nagapati sang ila abilidad nga madepensahan ang championship.
Una na nga ginpabutyag ni Clavecillas nga tungod sang pagbinuligay, determinasyon, kag suporta nga ila nabaton, nagpangibabaw ang performance sang Dinagyang Festival sa Aliwan Fiesta subong nga tuig. — via Public View
