Defensor-Debuque tandem sa 2025 midterm elections suportado sang Segundo Distrito sang Iloilo
ILOILO – Ginkumpirmar ni Dr. Kathryn Joyce Gorriceta, naga-isahanon nga nagapadalagan sa pagka-kongresista sa Segundo distrito, nga suportado nila ang tandem ni incumbent Governor Arthur Defensor, Jr., kag outgoing Anilao Mayor Nathalie Ann Debuque sa 2025 midterm elections.
Gin-athag ni Dr. Gorriceta nga gin-isa-isa nila konsulta ang mga local officials sa Segundo distrito agud makadihon sang desisyon kun sin-o ang suportahan sa pagka-governor kag vice governor.
“Gin-meet gid namon ang mga local officials—the mayors and vice mayors—kag ginpamangkot gid isa-isa kun ano ang ila nga stand because, as I’ve said, sila gid ya permi amon gina-konsulta. So, ang consensus, majority ma-align gid kay Governor Defensor kag sa iya partner nga si Mayor Nathalie Ann Debuque because sa madamo nga rason, kag may mga projects kag programa pa nga dapat tapuson. And sa amon naman personal nga desisyon, maugyon gid kami kay Governor Defensor kag iya partner.”
“MAY OFFER NGA DEFENSOR-GORRICETA”
Ginkumpirmar ni Dr. Gorriceta nga may tanyag sa iya bana nga si Congressman Gorriceta nga mag-tandem kay Governor Defensor sa masunod nga eleksyon.
Pero isa sa mga rason ni Congressman Gorriceta nga nagpang-alang-alang siya nga batunon tungod indi siya preparado kag halos wala niya nalibot ang bug-os nga probinsiya. Magluwas diri, indi man luyag sang kongresista nga “may matapakan nga iban nga tawo.”
Wala sang padalaganan sa masunod nga eleksyon si Congressman Gorriceta kag ginakonsiderar niya nga batunon ang tanyag nga posisyon sa gobyerno agud mabuligan ang mga Ilonggos.
Sa 2025 midterm elections, mabunggu-anay sa pagka-bise gobernador kanday Debuque kag outgoing fifth District Congressman Raul Tupas.
