Responder sang MDRRMO Concepcion patay sang nakabunggo sa motorsiklo sa Concepcion, Iloilo
ILOILO — Wala na nakalab-ut sa ospital ang 46-anyos nga lalaki sang nakabunggo ang ginamaneho nga motorsiklo sa Sitio Nangka Brgy. Calamigan, Concepcion pasado las-5:20 kahapon sang hapon.
Ginkilala ang napatay kay Leony Boy Arcacho nga miyembro sang Concepcion Municipal Disaster Risk Reduction and Management Office.
Suno kay Police Senior Master Sergeant Mark Gregory Barbo, imbestigador sang Concepcion Municipal Police Station, halin sa banwa sang Concepcion ang biktima kag pakadto sa direksyon sang Sara sang nakabunggo sa motorsiklo.
Ginamaneho naman sang 18-anyos nga lalaki ang Kawasaki Badja nga motorsiklo nga nagapaliko sa wala nga porsyon sang dalan.
Nagpa-carwash ang estudyante suno sa police kag pabalik na kuntani sa Concepcion sang wala natalupangdan ang nagapadulong nga motorsiklo.
Sa imbestigasyon sang police, nagtulok sa direksyon sang Sara ang estudyante rason nga wala natalupangdan ang nagapadulong nga motor.
Patal nga pilas sa ulo ang naagum sang biktima nga gindala pa sa Sara hospital pero gin-refer sa syudad pero wala nakaabot.
Wala sang driver’s license ang estudyante kag hindi rehistrado ang motorsiklo.
Lunsay wala sang helmet ang biktima kag ang estudyante.
Detained sa Concepcion Police Station ang 18-anyos nga driver. — Aksyon Paula Elambayo
