Beria Tolentino sang Beria Drug Group, gina-classify nga drug group leader base sa record sang PDEA 18

Negros Island Region — Gin-classify nga drug group leader si Beria Tolentino sang Beria Drug Group base sa record sang Philippine Drug Enforcement Agency ukon PDEA 18.

Si Tolentino ang naga-edad sang 50-anyos kag residente sang Bacolod city apang may balay man sa Talisay City, Negros Occidental.

Nagsugod sa pag-operate ang Beria Drug Group sang 2012 sa diin area of operation sini ang Bacolod City kag bilog nga Negros Occidental.

Sa record sang PDEA 18, wala sang pending nga kaso kag warrant of arrest si Tolentino.  Naga-tie up ini sa PDEA 6 identified Odicta Drug Group sa Iloilo.

Una nga nagakuha sang supply sa New Bilibid Prison ang Beria Drug Group apang sang naggamu ang NBP, nagsaylo ini sang source sa Marawi.

Naguwa ang pangalan ni Beria Tolentino matapos ginbuyagyag ni Ricky Serenio, ang nadakpan nga high value target drug personality, nga finance officer siya sang Beria Drug Group.

Si Serenio amu ang ginasugo nga managtag sang payola sa mga gin-identify ni Tolentino nga mga police, court employees, judges, taga-PDEA kag NBI kag katapo sang media agud proteksyunan ang ila aktibidad.

Samtang sa report sang Aksyon Radyo Bacolod, wala na sa custody sang Regional Special Operations Group ukon RSOG si Serenio kag ginsaylo temporaryo sa Talisay City Police Station.

Apang bantay sarado ini sang 6 ka mga miembro sang RSOG.  Ginpahayag nga magluwas sa grave coercion, may kaso man nga abduction si Serenio.  (JoMaque)