1 patay, 1 pilason matapos nagtambag sa away sang 2 barangay tanod sa San Miguel

San Miguel, Iloilo — Isa ang patay kag isa ang pilason sang nagtambag sa inaway sang duha ka barangay tanod sa Brgy 7 San Roque South las 7:30 kagab-i, Disyembre 15.

Suno kay PO3 Richie Alcala, duty investigator sang San Miguel Police Station, ginkilala ang napatay kay Meriandita Alipi, 61 anyos samtang ang pilason ginkilala kay Edgar Tanutan, 45 anyos sang nasambit man nga lugar.

Ginpahayag nga nakabais ni barangay tanod Eduardo Prado, 74 anyos ang kasubong man niya nga tanod nga tomboy.

Nagtambag ang mga biktima apang sila ang nabun-an ni Prado.  Naigo sa dughan si Alipi kag dead-on-arrival sang nag-abot sa Aleosan District Hospital samtang napilasan sa idalum nga parte nga pusod, wala nga parte sang dughan kag tuo nga guya si Tanutan nga padayon nga ginabulong sa West Visayas State University Medical Center.  

Napilasan man ang suspek sang ginlampusan sang wala pa makilala nga suspetsado. 

Confined sa Western Visayas Medical Center si Prado kag arrested ang status suno kay PO3 Alcala.

Gina-imbestigaran sang San Miguel police kon anu gid ang ginbaisan sang duha ka barangay tanod kag kun sin-o ang ginpahayag naglampos sa tanod nga suspek. (JoMaque)