Brigada Kontra Dengue sa mga eskwelahan sa probinsya, himoon sa Hulyo 27

By: JoMaque | Hulyo 18, 2019, 9:08am

Iloilo — Nagapanawagan ang DepEd- Division of Iloilo sa mga manunudlo, ginikanan, alumni kag iban pa nga mga sektor nga magpasakop sa Brigada Kontra Dengue sa Hulyo 27.

Suno kay Dr. Miguel Mac Aposin, Schools Division Superintendent, kasubong ini sa Brigada Eskwela antes magsugod ang klase apang ang tinutuyo sang lihok amo ang pagpaninlo kag pag-aksyon sa mga breeding ground sang lamok.

Ginduso ang lihok agud matapna ang pagtaas sang kaso sang dengue.

Gin-aprubahan na ni Governor Arthur Defensor Jr. ang programa suno kay Dr. Aposin.

LAKIP ANG MGA ESTUDYANTE?

Wala ginrekomendar sang DepEd ang pagpasakop sang mga estudyante agud malikawan ang ila exposure sa lamok.

Magadepende naman sa mga school heads kun maupod sa programa ang mga Senior High School students apang kinahanglan may approval halin sa ila mga ginikanan.

Nagacoordinate na ang DepEd sa mga Local Government Unit agud sa mga resources nga mahimo nila mabulig sa programa.