South Balibago Waterworks kag MPIW napilian nga ma-distribute sang tubig sa kabarangayan sa Iloilo City nga apektado sang water crisis

Duha ka bidders ang napilian nga ma-distribute sang tubig sa mga barangay sa Iloilo City nga tuman ka apektado sang water crisis.

Ini ang ginkumpirmar ni General Services Office Head, Engr. Neil Ravena.

Sa 696 cubic meters sang tubig nga kinahanglan kada adlaw, 70% ang idul-ong sang South Balibago Water Works samtang 30% ang idul-ong sang Metro Pacific Iloilo Water.

Gin-ako sang MPIW suno kay Ravena nga indi supisyente ang volume sang ila tubig rason nga 30% lang ang ila i-distribute.

Indi naman mahimo nga South Balibago lang ang kuhaon nga distributor tungod dalagkuan ang ila trucks kag indi makasulod sa mga suludlon nga barangay kasubong sang Navais, Mandurriao.

Gin-athag ni Ravena nga nadesisyunan nila nga ang barangay na lang ang ma-procure sang ila tagsa ka static water tanks gamit ang disaster fund sang barangay.

Masugod ang water distribution sa May 10. —via Justice Savvanah Pamplona