Mar 2015 04

By: Jocelyn Gelloagan-Maque

Nagpasalig ang bag-o nga OIC sang Transportation Management and Traffic Regulation Office (TMTRO) nga si Ms. Donna Acap nga mangin bukas sa media.

Suno kay Acap, magatalana siya sang isa ka adlaw kada semana para sa media agud mapahibalo ang mga developments sa TMTRO.

Ginpahayag ni Acap nga may otoridad na siya nga maghambal subong bangud siya na ang naga-uyat sang operations kag administration nga aspeto sang pagpadalagan sang TMTRO.

Mar 2015 04

By: Jocelyn Gelloagan-Maque

Arestado ang 34-anyus nga lalaki nga nagtiro patay sa duha ka mga construction workers sa Ajuy.

Nadakpan kaina sang aga si Rogelio Cuesta alyas Abloy nga nagapanago sa idalom sang katre sa balay sang iya kilala.

Ginpahayag ni Police Senior Inspector Ronie Brillo, hepe sang Ajuy PNP nga si Cuesta ang gintudlo nagtiro kanday Regan Hermano, 33-anyus sang Leganes, Iloilo kag Jeofrey Magno, 25-anyus sang Poblacion, Ajuy.

Maswerte nga nakaluwas ang upod nanday Magno kag Hermano nga si Resty Doctolero, 33-anyus sang Dumangas bangud madasig ini nga naghapa sang gintiro ni Cuesta.

Si Hermano ang may pilas sa wala nga dughan, samtang may pilas naman sa wala nga likod si Magno kag dead-on-arrival sang gindala sa Sara District Hospital.

Nag-ako si Cuesta sa mga pulis nga may agrabyo siya kay Magno.

Kaso nga double murder kag attempted murder ang ipasaka batuk kay Cuesta.

Mar 2015 04

By: Aine Grace Bravo

Ginpanugyanan ni Kagawad Joshua Alim, majority floor leader sang City Council, ang mga city employees nga nadalahig sa anomaliya sa Iloilo Terminal Market nga indi pag-ibalewala ang findings kag recommendations sa joint committee report.

Ginpabutyag sang konsehal nga mapag-on ang mga ebidensya sa gina-alegar tuklo-anay sa merkado. May posibilidad suno sa iya nga mangin kapareho sang mga respondents sa anomaliya sa housing projects sang syudad ang madangatan sang mga empleyado kon pabay-an nila ang nasaad sa report.

Ginrekomendar nga pasakaan sang kaso kriminal kag administratibo ang walo ka empleyado sang syudad nga ginalakipan nanday City Administrator Norlito Bautista, anay Local Economic Enterprise Office Head Vincent de la Cruz kag asawa nga si Xenia, market-in-charge Ely Sumaray, retired market supervisor Enrique Billena, Marcela Ymalay, Winona Jaudian kag Fedelyn Villalobos.

Ang pahayag ginhimo ni Alim kasunod sang pag-adoptar sang city council kahapon sa 44-pahina nga committee report base sa gin-conduct nga investigation in aid of legislation sa mga anomaliya sa merkado.

Mar 2015 04

By: Aine Grace Bravo

Pilason ang tatlo ka lalaki nga narumpagan sang canopy sang building sa dalan JM Basa, City Proper kahapon.

Ginkilala ang mga biktima kanday Richard Abanag, 28-anyos; Winston Palmon, 29-anyos kag Ercel Fengel, 26-anyos nga padayon nga ginabulong sa Iloilo Mission Hospital.

Ginpahayag nga nagahakwat sang steel gate ang mga biktima sang nasalapay ang canopy sang building kabangdanan nga narumpag.

Mar 2015 04

By: Aine Grace Bravo

Duha ang patay sang natiruhan sa Poblacion, Ajuy kaina sang kaagahon.

Ginkilala ang mga biktima kanday Regan Hermano, 33-anyos sang Leganes nga napilasan sa dughan kag Jeffrey Magno, 35-anyos nga napilasan sa likod. Gindala pa sa ospital ang mga biktima apang wala na natabangan.

Ginatudlo nga nagtiro sa mga biktima si Rogelio Cuesta Jr nga madasig nagpalagyo pagkatapos sang insidente. Ginpahayag nga naga-inum-inum ang mga biktima sang ginpalapitan sang suspetsado kag gintiro sa wala mahibaluan nga rason.

Wala naman naigo ang kaupod sang mga biktima nga si Resty Doctolero sang Dumangas. Gina-imbestigaran na sang Ajuy police ang insidente.

Mar 2015 03

By: Jocelyn Gelloagan-Maque

Nabuhinan sang 5 porsiento ang paginutok sang mga miembro sang Social Security System (SSS) office sa Mapa Street, City Proper sang nagbukas na ang SSS Molo Branch.

Ginpahayag ni SSS-Molo Branch Manager Moises Rene Gonzales nga 400 tubtub 500 na ka mga miembro ang naga-transaksyon sa ila opisina adlaw -adlaw.

Gin-athag ni Gonzales nga pareho man lang ang transaksyon sang SSS Mapa Branch kag Molo magluwas lang sa pagbayad bangud wala pa sang tellering section ang SSS-Molo Branch.

Samtang, ang SSS sattelite center sa Robinsons’ Place kag Passi City naman ang para gid lang sa verification kag indi pwede ang mga claims sang SSS member.

Mar 2015 03

By: Jocelyn Gelloagan-Maque

Mas maayo nga magbayad sang buhis kag mag-file sang income tax returns sang mas temprano pa agod malikawan ang penalidad.

Ginpahayag ni Revenue District Office (RDO) 74 Head Luis Alberto, Jr. nga nagabatun na subong ang BIR 6 sang bayad kag filing sang ITR para sa Abril 15 nga deadline.

Kon deadline na sa pag-file sang ITR suno kay Alberto, indi malikawan nga nagadinaguso ang mga taxpayers.

Magahiwat man ang BIR 11 sang Tax Campaign kick-off sa Marso 27 sa Amigo Terrace Hotel nga pagatambongan sang nagkalain-lain nga ahensya sang gobyerno kag mga public official.

Nag-apelar man si Alberto sa mga tumb taxpayer nga mag-enroll na agod magamit ang electronic filing sang ila ITR.

Mar 2015 03

By: Jocelyn Gelloagan-Maque

Indi illegal ang pagpadulong sang mga punong barangay sa Cebu.

Gin-athag ni Department of Interior and Local Government (DILG) Provincial Director Teodora Sumagaysay nga legal ang biyahe sang mga kapitanes kon sundon lang ang accounting rules and regulations sang Commission on Audit (COA).

DILG Region 6 suno sa iya ang magahatag sang authority sa mga punong barangay bangud sa guwa sang probinsya hiwaton ang convention.

80 porsiento sa mil 721 ka mga barangay captains ang magatambong sa convention sa Waterfront Hotel and Convention Center sa Cebu City sa Marso 9 tubtub 11.

Mar 2015 03

By: Aine Grace Bravo

Nagalab-ot sa 15 mil 500 pesos ang registration fee nga pagabayaran sang mga punong barangay nga maga-upod sa convention sang Liga ng mga Barangay Fefderation sa Lahug, Cebu halin Marso 9 tubtub 11.

Kalakip sa registration ang accommodation, pagkaon, plete kag kits nga gamiton sang mga partisipante. Suno kay Liga Provincial Federation President Jeneda Salcedo-Orendain, pagakuhaon sa pundo sang barangay ang ibayad nga registration fee. Apang gin-athag sini nga indi compulsory ang convention bangud magadepende ini sa availability sang pundo sa barangay.

Gin-imbitar nga speaker sa Liga convention sanday DILG Secretary Mar Roxas kag Governor Arthur Defensor. Ginpabutyag ni Orendain nga katuyuan sang convention ang pag-expose sang mga punong barangay sa mga practices kag programa sang pagakadtuan nga lugar.

Mar 2015 03

By: Aine Grace Bravo

Napuhag ang mga residente sa Barangay Cochero, Molo sang nabatian ang lupok sang pusil kagab-i.

Suno kay Kagawad Vivian Binoy, gintudlo sang mga residente si Jackie Latumbo sang Calinog nga nagpinalupok sang pusil. Ginpahayag nga antes nagluntad ang insidente, nga nagbaisay pa ang suspek kag kasilingan sini.

May na-recover ang mga pulis nga empty shell sang 38-caliber revolver sa lugar. Preso na si Latumbo sa karsel sang Molo Police Station.

Page 1 of 60712345...102030...Last »