Na-alarma si Governor Arthur Defensor sa pagsaka sang kaso sang dengue sa provincia.

Sa record sang Provincial Health Office (PHO), 926 na ang kaso sang dengue kag 8 na ang patay halin Enero tubtub Mayo 18 subong nga tuig.     Ang figure mas mataas sang 168% sa nalista sa kapareho nga period sang nagligad nga tuig.

Ginpanugyanan ni Defensor ang mga pumuluyo nga padayunon ang pagpaninlo agud madula ang breeding places sang mga lamok ilabe na ang nagadala sang dengue. Dapat mapakonsulta man gilayon ang mga nagahilanat nga bata kag indi hulaton nga maglala.

Ginsulit man sang gobernador nga libre sa mga district hospitals ang mga biktima sang dengue.

Insulto sa kaalam sang mga miembro sang city council ang pagpasar sang resolusyon nga indi madepensahan.

Reaksyon ini ni Kagawad Plaridel Nava matapos ginwithdraw ni Kagawad R. Leone Gerohi ang resolusyon nga ginpahayag ginpapasar sa iya ni Mayor Jed Patrick Mabilog matapos ginkwestyon. Suno kay Nava, dapat gindepensahan sang proponent kun kagustuhan sang alkalde ang resolusyon. Gintawag sang konsehal nga ridiculous ang pagpa-agenda sang resolusyon apang indi man madepensahan.

Partikular nga gintumod ni Nava ang resolusyon nga nagahatag sang otoridad kay Mabilog nga magbaton sang proposal kag magnegosyar sa mga interesado nga concessionaire nga magdeliver sang tubig sa syudad.

Apang ginwithdraw ni Kagawad Gerochi ang resolusyon matapos nagraise sang factual kag legal basis sanday Kagawad Nava kag Perla Zulueta.

Anum ka kaso ang ginapreparar sang management sang ACCEA Trading kag Danco Security Agency batuk sa pulis kag mga tanod nga ginpahayag nagsapote kag nagdakop sa ila caretaker sa Brgy. Bolilao, Manduriao sang nagligad nga semana.

Suno kay Atty. Romeo Gerochi, lakip sa ipasaka nila nga kaso ang grave coercion, robbery, illegal arrest and arbitrary detention, less serious physical injuries kag grave threats. Lakip naman sa kasuhan sanday PO3 Roque Gimeno III, tanod commander Alex Tope kag mga tanod nga sanday Roland Daria kag Jessie Sueta.

Ginpahayag ni Gerochi nga gamiton nga ebidensya sa pagpasaka sang kaso ang CCTV footage sa diin makita nga wala sa proper uniform si PO3 Gimeno sang nagresponder sa gin-alegar reklamo sang mga pamatan-on nga nanita kag nanaya sang pusil si Gerry Bernardo. Makita sa CCTV footage ang paglalas kag pagpuli kastigo sang pulis kag mga tanod kay Bernardo samtang ginkuha sang isa ka tanod ang pusil sa bangko sa sulod sang compound.

Nasunog ang kalan-an kag tatlo ka balay sa Barangay Hipodromo, City Proper kagab-i.

Madasig nga ginlamon sang kalayo ang mga balay bangud nga human sa light materials. Dyutayan man nga nadalahig ang establisemento komersyal sa kilid sang pamalay.

Gintudlo nga naghalin ang kalayo sa tiangge nga ginapanag-iyahan ni Ronalyn Sabado. Padayon nga gina-imbestigaran sang Bureau of Fire Protection ang ginhalinan kag kahalitan sang sunog.

Nagreklamo ang taxi driver nga ginbayaran sang iya pasahero sang peke nga 500 pesos. Suno kay Lorenzo Sumalbag sang Cabanbanan Oton kag driver sang A and R taxi, nagsakay sa SM city ang iya pasahero sang Lunes sang gab-i. Nabal-an nga peke ang kwarta sang gin-remit ni Sumalbag sa iya operator. Ginpahayag ni Sumalbag nga ginbalik sa iya sang operator ang kwarta bangud wala ginbaton sang ginbayad sa hardware pagkasunod nga adlaw.

Apektado na ang Boracay sa tensyon sa tunga sang Pilipinas kag Taiwan. Pahayag ini ni Department of Tourism ukon DOT 6 director Atty. Helen Catalbas kasunod sang pagkanselar sang madamo nga taiwanese tourists sang ila bakasyon sa isla. Suno kay Atty. Catalbas, naga-average sa 200 tubtub 300 ka mga taiwanese ang naga-abot sa isla kada adlaw ukon kapin 5 mil ka mga turista kada bulan kag ginabanta sa 92 tubtub 200 dolyares ang magasto sang isa ka turista kada adlaw. Base sa computation ni Catalbas, malab-ot sa 41 milyones pesos ang madula nga income halin sa mga Taiwanese tourists sa isa ka bulan bangud taiwan ang nagapanguna nga may pinakadamonga turista nga naga-abot sa isla. Gindugang ni Catalbas nga daku pa gid nga bagay ang pagkanselar sang Zest Air sa ila flights sugod sang mayo 20 tubtub hunyo 30.

Gin-akusahan ni Calinog Mayor Alex Centena ang iya kasumpong sa nagligad nga pinili-ay nga si former Mayor Salvador Divinagracia nga nagbubo sang milyones sa nabukid nga kabarangayan sa tion sang pagpangampanya. Ini ang gintumod nga rason ni Mayor Centena sang pagkapierde niya sa gintumod nga mga barangay. Apang ginkalipay ni Centena ang suno diri, pagboto sa iya sang mga tawo bisan nga wala siya sang kwarta rason nga siya gihapon ang nagdaug. Nagpasalig si Centena nga may mga proyekto na siya nga ginatapos sa nabukid nga mga barangay. Masubo lang suno sa iya nga nagakalipat ang mga tawo kun malipnan sang kwarta.

Ginbuno sang lalaki ang gin-alegar kerido sang iya asawa sa dalan Mabini, City Proper kagab-e.

Ginsulong ni Bryan Capanas sang Tabuc Suba, Jaro ang ginpahayag kerido sang iya asawa nga si Jimmy Catin matapos nakita nga naga-updanay ang duha. Napilasan sa butkon kag likod si Catin kag padayon nga ginabulong sa ospital.

Nagsurrender naman si Capanas kag preso na sa karsel sang Police Station 1.

Diretso ni former Mayor Badong Divinagracia ang magprotesta bangud sa kadalag-an ni incumbent mayor Alex Centena sa bag-o lang natapos nga piniliay.

Opinion ini ni Centena sa plano sang kampo ni Divinagracia nga magprotesta. Nagdaug si Mayor Centena nga may 113 ka boto nga abanse batuk kay Divinagracia. Gin-athag ni Centena nga ang Comelec ang nagproklamar sa iya nga nagdaug kag ini ang kamatuoran.

Suno kay Centena, wala siya nagdinaya sa 113 lang ka boto nga abanse. Gintindugan man sini nga naguwa ang kamatuoran sang pagamit sang PCOS machine kag mabudlay ini dayaan.

Nagsaka ang numero sang mga tawo sa Western Visayas nga positibo sa Human Immunodeficiency Virus (HIV) bangud madamo ang naguwa kag nag-ako nga infected sila.

Pahayag ini ni Ms. Charity Yanson-Peria, coordinator sang Sexually Transmitted and Infectious Diseases sang Department of Health 6.

Ginakabig ni Peria nga maayo ini nga sinyales bangud madamo ang maka-access sa mga serbisyo sang gobyerno sa Western Visayas lakip ang treatment hub nga gintukod para sa People Living with HIV.