15 ka Panel Investigators, Imbitado sa Imbestigasyon sang City Council Committee on Police Matters sa Tatlo ka Punong Barangay nga Ginapatihan Protektor sang Illegal Drugs–Councilor Jeffrey Ganzon

Iloilo City–15 ka mga panel investigators ang gin-imbitar sang Committee on Police Matters sa imbestigasyon sa tatlo ka mga punong barangay nga ginapatihan protektor sang illegal nga druga.

Sa gin-release nga invitation ni Councilor Jeffrey Ganzon, chairman sang komitiba, lakip sa mga gin-imbitar sanday ICPO Director PSSUPT Remus Zacharias Canieso, PDEA 6 Director Gil Pabilona, City DILG Director Atty. Ferdinand Panes kag 12 ka mga konsehal. Hiwaton ang imbestigasyon sa Oktubre 17, las-2 sa hapon sa session hall sang Sangguniang Panlungsod.

Suno kay Ganzon, tuyo sang imbestigasyon nga makatipon sang mga ebidensya kag verified complaints batuk sa nasambit nga mga punong barangay. Importante suno sa iya ang verified complaints bangud balik-awot kun ang konseho ang maga-reklamo kag city council man ang magadesisyon.

Sa gin-aprubahan nga resolution nga ginsponsor ni Councilor Plaridel Nava, gintumod sini sanday Punong Barangay Keith ‘Dabing’ Espinosa sang Monica-Blumentritt, City Proper; Remia Prevendido-Gregori sang Bakhaw, Mandurriao kag Noemi Jablo sang Desamparados, Jaro nga may koneksyon sa illegal nga druga. (AGB)