Cause-oriented groups, nag-rally sa atubang sang Iloilo City Police Office

Iloilo City – Nag-protest rally ang pila ka mga cause-oriented groups sa atubang sang Iloilo City Police Office (ICPO) kaina sang aga, Mayo 15.

Suno kay Mr. Elmer Forro sang Bayan Panay, nag-protesta ang ila grupo bangud antes ang election, nag-post sa social media ang ICPO nga indi pag-botohon sa midterm elections sang Mayo 13 ang mga party-list kasubong sang Bayan Muna, Gabriella, Alliance of Concern Teachers nga ginpahayag gin-disqualify sang Commission on Elections (Comelec).

Asud-asod pa nga rally ang himuon sang grupo suno kay Forro agud ipahibalo sa gobyerno ang ila hibubun-ot.

‘GIN-AKU SANG ICPO’

Gin-aku ni ICPO Director Police Colonel Martin Defensor Jr nga naka-share gid man sa Facebook ang ila police relation officer angut sa party-list groups nga ginpahayag gin-disqualify sang Comelec.

Suno kay Defensor, nakabaton siya sang reklamo kag iya ginpa-check kon matuod gid man nga gin-disqualify sang Comelec ang pila ka party-list groups.

Sang napamatud-an nga ‘fake news,’ iya gilayon nga ginpa-delete ang post nga gin-share sang ICPO.

Ginpahangop man ni Defensor sa mga lideres ang ila bahin kag nagpangayo man siya sang pasaylo sa ginhimo sang iya mga pulis. (JoMaque)